معلومات عامة عن فحص اللغة B2 من منظمة TELC

كل شخص عن فحص b2 بلتفصيل 

كل شكر للاخت شذى 

.....................................

الجزء الاول :

معلومات عامة عن فحص اللغة B2 من منظمة TELC : 

الفحص بشكل عام قسمين , إذا انجحتوا بقسم ورسبتوا بقسم ففيكم تعيدوا بس القسم الي رسبتوا فيه بإنكم تعطوا نسخة عن نتيجة الفحص القديم لمركز الامتحان 

ملاحظات عامة للامتحان:

البسوا ساعة لإنه عامل الوقت مهم جدا بالامتحان

ممنوع تدخلوا موبايلكم وطبعا أي دفتر أو كتاب ع قاعة الامتحان 

النوم والراحة النفسية قبل الفحص مهمة جدا , ليلة الامتحان مافي داعي للدراسة والنوم بكير لإنه عادة الفحص بيبدأ الساعة 9 الصبح 

يفضل تحلوا نماذج قد ما بتقدروا , والصورة هي لكتاب فيه 3 نماذج و بتلاقوا عالنت نموذجين ع الأقل 

وانشالله الملاحظات أدناه رح تساعدكم تتجاوزوا الامتحان والي رح نزلها على أجزاء لإنها كتير طويلة 

القسمين هني : كتابي و شفهي 

----------------------------------------------------------------------------------------

قسم الكتابة مقسم ل 3 أقسام .. مدته الإجمالية للقسم 150 دقيقة 

1- القراءة : مدته 90 دقيقة 

---------------------------

مقسم ل 5 أجزاء : 

-الجزء الأول اسمه Leseverstehen لازم ياخد معكم 15 دقيقة , بيكون عبارة عن 5 مقاطع , بدكم تلاقولهم عناوين ... بيعطوكم 10 عناوين , بدكم تلاقوا 5 عناوين صحيحة 

لازم بهالفقرة تقرأوا الخطوط العريضة وبسرعة ... مافي داعي تركزا وتفهموا التفاصيل ... بكفي قراءة سريعة للمقطع وفهم عام لحتى تلاقوا العنوان الصحيح 

ملاحظة مهمة جدا جدا : العنوان عند الأجانب بيكون صريح و واضح .... يعني ما تدروا على عنوان متل فوضى الحواس أو عابر سرير -_- .... العنوان بالصحف الأجنبية بيكون تماما يمثل المضمون مو متل الروايات العربية الي بيكون العنوان سريالي 

عليه 25 علامة , كل جواب صحيح 5 علامات 

- الجزء الثاني : Detailliertes Lesen مو أكتر من 20 دقيقة 

عبارة عن نص , أنا إجاني مقطع عن جوجل إيرث وأحدث اصداراته 

عليه 5 أسئلة , كل سؤال إله 3 خيارات بدكم تختاروا الجواب الصح والدقيق ... كمان 25 علامة , كل جواب صح عليه 5 علامات

هاد النص لازم تقرأوه بدقة شديدة وتركيزمليح على الخيارات لكل سؤال .. أوقات الفاصلة بتغير معنى الجواب , فلهيك بتقرأوا الخياراات التلاتة بدقة و بتختاروا أهم الشي االجواب ع أساس النص مو ع اساس ثقافتكم العامة , انتبهوا إنه أوقات الطالب ممكن يغش حاله ويجاوب ع السؤال من ثقافته العامة بدل ما ينتبه شو جاي بالنص الحرفي 

كمان ملاحظة مهمة : وجود كلمات مطابقة للنص بأحد الخيارات (الأجوبة) تماما للنص , هاد غالبا بيكون جواب خاطئ وهدفهم يلعبوا فيه 

- الجزء الثالث : Selektives Lesen كمان 20 دقيقة

هاد عشر جمل , ل 12 مقطع ... الجمل بتكون عبارة عن بحث : يعني صديقك يبحث عن حفلة موسيقية 

المقاطع بتكون إعلانات عن كتير أمور , بتبحث بالمثال الي ذكرته عن إعلان عن حفلة موسيقية ... لازم تنتبهوا لتطابق الإعلان تماما لموضوع البحث 

مثلا أوقات بذكروا : بدك تاخد ابنك الي عمره 12 ليحضر فيلم ... فلازم تبحث مو بس عن إعلان لفيلم , لازم تركز إنه الفيلم بناسب عمر الطفل الصغير 

طبعا كونه في 12 جملة و عشر مقاطع , ففي جملتين بيكون ما الهم مقابل إعلاني , والجواب الصحيح بهالحالة هو x 

كل جملة عليها 2.5 علامة , العلامة الكلية 25 علامة 

- الجزء الرابع : Sprachbaustein Teil 1 مدته 15 دقيقة

هاد عبارة عن ايميل مع فراغات و كل فراغ إله 3 خيارات ... الأجوبة بهاي الفقرة بتعتمد ع القواعد , طبعا رح إذكرلكم أهم القواعد الي لازم تدرسوها لتجيبوا علامة مليحة بهاد القسم 

1.5 علامة لكل فراغ .. بالإجمالي 15 علامة لهاد الجزء 

القواعد المهمة لتنجيح هاد القسم : 

أول قاعدة , قاعدة الكلمات التوصيلية : 

Dabei, Damit,dafür, dazu, daran, daüber, .....etc 

بتلاقوها من هاد الرابط 

http://www.german-grammar.de/grammar/chapter_25/25_4_4_1_da_and_preposition.htm

قاعدة الصفات مع الأرتيكل 

يعني eine neue Lampe أو die neue Lampe 

ببقى بصورلكم دفتري مع الجداول لتحفظوا القاعدة 

طبعا قاعدة أحرف الجر وشو بيجي بعدهم Dative oder Akkusative

قاعدة : dessen ; deren ; denen 

أهم شي تنتبهوا إنه هدول بيرجعوا ع الاسم الي قبلهم وليس الي بعدهم .. بالعادة الأرتيكل وكل شي باللغة الألمانية بيعتمد على جنس الإسم الي بعده ... إلا بهدول , بيرجع على جنس الاسم السابق لإنه معناتهم الذي , التي , الذين , اللواتي باللغة العربية 

قاعدة : würde ; hätten .... تنتنهم نفس المعنى , بس بتتطلعوا ع آخر الجملة , إذا للفعل منضاف ge فبتختاروا hätten 

إذا الفعل بمصدره العام , فبتختاروا würden 

وطبعا بقية القواعد البسيطة بالمستويات المبتدئة , بس غالبا بس القواعد الي ذكرتها بهاد البوست هيي المهمة 

إذا كان معكم وقت وترددتوا بشي كلمة إذا مذكر أو مؤنث لتطبقوا القاعدة , شوفوا الفقرات الي مرقت معكم بالأقسام السابقة .... عملت هالحيلة و بسببها حصلت على علامة السؤال :P 

- الجزء الأخير بالقراءة : 

هاد بالنسبة إلي هو الأًصعب لإنه مقطع مع فراغات و عاطينك كومة كلمات لتحطهم بالفراغات , فبدك تقرأه أكتر من مرة لتعرف شو الكلمة المناسبة للفراغ 

هاد الجزء بيعتمد على ثقافتك العامة باللغة الألمانية .. عليه 15 علامة 

نصيحتي تجربوا فيه قدر المستطاع , بحيث شو ما حصلتوا علامة منه بيكون تمام 

...........................................................................................

.....................................

الجزء الثاني :

تكملة ببوست عن فحص اللغة B2-Telc :

بعد ما خصلنا قسم القراءة , رح نحكي عن القسم السماعي الي بيكون مدته 20 دقيقة بالإجمال

بيكون في استراحة 10 دقايق بين القراءة والسماعي 

بنصحكم تجربوا تسرقوا الدقايق الي بتكون المذيعة بالمسجلة عم تقرأ السؤال أو قبل ما يبلش الامتحان بدقايق ع السريع 

بإنكم تترجموا الجمل بأغلب النصوص , خاصة الكلمات المفتاحية للجملة منشان لمن تسمعوا تعرفوا على شو لازم تدققوا , مثلا اسم شهر , درجة حرارة .. الخ 

هاد القسم مؤلف من 3 أجزاء , بكل الأقسام مطلوب تجاوبوا ب صح أو خطأ و بتسمعوا كل جملة وكل مقطع مرة واحدة فقط لهيك التركيز العالي مطلوب 

- الجزء الأول اسمه Global verstehen مؤلف من 5 جمل سهلة نوعا ما ومطلوب تدققوا بشكل بسيط عن كل جملة .. بتكون أخبار من الراديو : اقتصاد , سياسة , طقس ....الخ 

5 علامات لكل جملة , يعني 25 علامة لكل الجزء 

- الجزء الثاني Detailverstehen 

هاد بيكون لقاء مع شخص ع الراديو , مثلا إجاني بالفحص لقاء مع طالب ألماني سافر ع أمريكا ودرس بجامعة ستانفورد العريقة وعن تجربته بالدراسة بهيك جامعة والصعوبات الي واجهها والايجابيات 

.... اللقاء بيكون طويل , شي 7 دقايق لهيك بتجاوبوا وإنتو عم تسمعوا ولو بتكونوا مترجمين الجمل قبل ف كتير بتسهل عليكم الإجابة

على كل جملة 2.5 , بالإجمال عشر جمل 25 علامة 

- الجزء الثالث Selektives Verstehen 

هاد أصعب جزء , 5 جمل بس بيلعبوا كتير بالكلمات وبيحطوا كلمات بديلة ... الصعوبة بإنكم تفهموا كل الكلمات بالجملة لتعرفوا شو المقصود تماما من الجملة 

5 علامات على كل جملة , 25 علامة على كل الجزء 

مدته 6 دقايق ... أهم ملاحظة وعنجد فادتني , بس كانت الإجابة بديهية فبتكون إجابتك غلط .. لإنه بهاد المقطع بالذات بيلعبوا كتير ... يعني إذا تكررت الكلمات وجاوبت بطريقة بديهية إنه : صح ... ف شك بحالك وغالبا الجواب : غلط 

.....................................

الجزء الثالث :

الجزء الثالث من القسم الأول من الفحص ,هو قسم المواضيع ... طبعا أنا كتابتي ضعيفة ولهيك الي عملته إني عرفت إنه الفحص دائما بيجي خيارين لكتابة موضوع من أصل 3 خيارات هيي :

1- تكتب رسالة شكوى على كورس اشتركت فيه و تطالب بمصرياتك أو جزء منها اسمه Beschwerdebrief 

2- تقديم طلب ع وظيفة أو براكتيكوم بشركة (بحث لفترة قصيرة وإنت طالب بالجامعة) Bewerbung 

3- قرأت إعلان و بدك تستفسر عن معلومات بالإعلان , مثلا شركة تأمين صحي عاملة إعلان وإنت حابب تشترك معهم وبدك معلومات عن نقاط معينة 

طبعا الموضوع الثالث كتير موسع و صعب , فقررت احفظ كليشات جاهزة (مجموعة جمل) للموضوعين الأوليين , بحيث إذا إجاني واحد منهم اختاره فورا و طج هالجمل لحصل أكبر قدر من العلامات 

الموضوع عليه 45 علامة .... مطلوب تحكوا عن نقاط معينة , 

هلأ رح اكتبلكم الكليشات الي حفظتها لكل موضوع , احفظوها و الي بيضل عليكم إنكم تضيفوا كم جملة حسب النقاط المطروحة بنص الموضوع المطلوب بالامتحان 

.....................................................................................

أول شي ترتيب البريد كالتالي :

على الزاوية اليسارية العليا عنوانك الشخصي , اسمك , اسم الشارع , اسم مدينتك مع البوستال كود 

تحته عنوان المرسل إليه , بيكون مذكور بنص الموضوع 

تحته : عنوان الموضوع وعلى الجهة التانية من اليمين : اسم مدينة مركز الامتحان , تاريخ الامتحان 

..................................................................................

كليشات موضوع Beschwerdebrief الشكوى :

...................................................

عناوين ممكنة للرسالة : 

Rückforderung meiner Zahlung von 120,00 Euro 

أو 

Beschwerde über den ..... (حسب الموضوع )

النص :

دائما بيبدأ بالخطاب الرسمي الكلاسيكي : 

Sehr geehrte Damen und Herren,

Als ich Ihre Anzeige in der Zeitung las, war ich sofort begeistert. Aber jetzt bin ich schockiert, denn das war nicht dementsprechend. was ich erwartet habe. 

Leider konnten Sie Ihr Versprechen nicht halten. 

بعد هالمقدمة بتحكوا عن الأمور السيئة بالكورس أو التدريب حسب النقاط المذكورة بنص الموضوع 

رح حط مثال عن اعتراض على كورس لغة :

Der Lehrer hat sehr schnell und im Dialekt gesprochen, so dass niemand ihn verstanden kann. 

In der Whongemeinschaft habe ich mit verschedenen Studenten, aber nicht mit Deustchen zusammengewohnt. So kann ich meine Deutsche Sprache nicht verbessern. 

Ich möchte noch hinzufügen, denn bis jetzt kein Sport Programm gibt. 

بعدين فيكم تستخدموا هي الخاتمة:

Eigentlich meine Erwartungen waren ganz anders. 

Falls Sie kein Lösung für diese Problem finden, müssen Sie mir 50% von meinem Bertrag zurückerstalten. 

Für eine baldige Antwort wäre ich dankbar. 

Mit freundlichen Grüßen, 

Shatha Alkhalil 

تقريبا إذا حفظتوا الجمل الي كتبتها ف 3 أرباع الموضوع صار قوي و الباقي هيي كم جملة حسب نص الموضوع الي بجيكم 

......................................................................................................................

الموضوع التاني الي حفظتله كليشات هو موضوع التقديم لبراكتيكوم بشركة Bewerbung:

Sehr geehrte Damen und Herren,

ihre Stellenanzeige habe ich im Internet auf Ihrer Hompage gelesenund bewerbe mich hiermit auf den von Ihnen ausgeschriebenen Praktikumsplatz im Bereich .... (هون بتذكروا مثلا هندسة ميكانيك أو علوم أو حسب الموضوع )

Um mein Studium abzuschlißen muss ich noch ein Praktikum im .... Bereich machen.(كمان مكان النقاط , بتحطوا اسم المجال الي حابين تعملوا فيه براكتيكوم 

Deshalb würde ich sehr gerne ein Praktikum bei Ihnen machen. 

Anbei ein Kurze Beschreibung zu meiner Person: 

Ich studiere in 5.Semester ..... an der Universität Ilmenau. 

Ich spreche neben Englisch und Deutsch auch Arabisch und etwas Spanisch. (فيكم تختاروا لغات كمان غيرها في حال طرحوا مثلا براكتيكوم بفرنسا أو هيك مطلوب بنص الموضوع 

Zu meinen Stärken gehören Kontaktfreundigkeit, Hilfsbereitschaft, Flexiblität und Zurverlässigkeit. 

Ich bin sehr teamfähig und kann mich schnell in ein neues Team integrieren. 

الخاتمة 

Bei weiteren Fragen können Sie sich gerne an mich wenden. 

Ich freue mich auf Ihre Einladung zu einem persönlichen Vorstellungsgespräch. 

Mit freundlichen Grüßen, 

Shatha Alkhalil 

هي المواضيع هيي تجميعي الشخصي من عدة مواضيع قرأتها ... فيكم تاخدوا فيها أو ببساطة تكتبوا شي من ثقافتكم الخاصة ... أنا نزلت هي البوستات تحديدا للأشخاص الي متل وضعي , مضطرة تنجح بالفحص بس ما عندها وقت لتعمل كورس ... بالتوفيق للجميع يارب :) 

.....................................

الجزء الرابع :

حكيت بالبوستات التلاتة السابقة عن القسم الأول من الامتحان , الجزء الكتابي .. هلأ رح نحكي عن الجزء التاني الي هو الشفهي .... بالنسبة للطلاب الي عملوا كورسات ألماني رح يواجهوا صعوبة بهاد القسم أكتر من القسم الأول لإنه بيلزم خبرة بالكلام وتمرين بالحكي مع الألمان يومي وعادة بالنسبة للطلاب الي لساتهم برات ألمانيا غير متوفر هالخيار بس مع هيك , إذا بحضروا حالهم ف ممكن يتجاوزوه 

ميزة هاد الجزء إنه بيكون معك شريك بدك تتناقش معه مو بس لحالك .. معك 20 دقيقة لتجهز لهاد الامتحان تفصل بينه وبين القسم السابق وطبعا ممكن يجي دورك بعد كذا ساعة فهيك بيكون معك وقت مليح ل تريح شوي و تروح تحضر على رواء لتنجح فيه .... مدة الامتحان لهاد الجزء حوالي ربع ساعة

الامتحان مؤلف من 4 أجزاء :

الجزء الأول : تعريف عن نفسك , مع إنه ما عليه علامات لكنه مهم جدا لإنه رح يكون الانطباع الأول للجنة عن الطالب ... متل ما بنصحكم عطول بمقابلات المنح , هون نفس الشي بنصحكم بالجرأة و البسمة ما تفارق وجههكم و ما تكتفوا بالتعريف التقليدي عن أنفسكم : اسمكم , عمركم , مهنتكم , بلدكم , وضعكم العائلي ... الخ , جربوا كونوا مبدعين و فرجوا اللجنة أكتر من هيك ... احكوا بطلاقة و بثقة وبسمة و ضيفوا ممكن تفاصيل عن بلدكم و قديش صرلكم بألمانيا وليش لازمكم النجاح بهاد الفحص (جنسية أو تلاقي عمل بألمانيا ... الخ)

هيك تفاصيل بتعطي ألفة بين اللجنة وبينكم 

الجزء الثاني : اسمه Präsentation , من اسمه معناها تحضروا للجنة حديث عن موضوع معين من المواضيع المطروحة 

لاحظت إنها دائما بتكون عن أحد هي المواضيع : فيلم حضرته وحبيته , رحلة عملتها , كتاب قرأته 

بالتالي فيكم تجهزوا قبل الامتحان موضوع وتحفظوه بصم , وتروحوا تقولوه قدام اللجنة 

جربوا تعطوا تفاصيل كتيرة بالموضوع , مو بس كم سطر وخلصنا .. لإنه الحكي كتير سريع , لازم تجهزوا شي صفحة ونص لإنه أدوبهم بيطلعوا كم دقيقة ... كل ما كان في تفاصيل أكتر , كل ما استمتعت اللجنة لموضوعكم و تابعتكم بقوة

بعدها لازم تكونوا جاهزين لأسئلة الشريك الي معك بالامتحان و هون ضروري تفهموا سؤاله و تجاوبوا صح 

بالمقابل لمن بيكون دور شريكك بإلقاء المحاضرة , لا تصفن وتنسى إنك تتابعه بدقة وفورا تخترع براسك أسئلة منشان لمن يخلص تسأله ياها و تتناقش معه بجوابه كمان ... لازم تفرجي اللجنة قدرتك على المناقشة مع الشريك , لإنه مؤشر لإلهم بالحياة الحقيقية كيف رح يكون تفاعلك مع زملائك بالعمل أو مع الناس بالشارع 

الجزء الثالث : Diskussion بيعطوك بهاد التمرين مقطع عن موضوع معين , ضروري تقرأ النص كامل و تنتبه للتفاصيل وشو رأي الكاتب بالمقطع بدقة مو من خيالك 

بتشرح للجنة عن المقطع , يعني بتعطيهم ملخص صغير بعدين بتعطي رأيك الشخصي بهاد المقطع , قديش مقتنع بكلام الكاتب وإذا لأ فليش مانك مقتنع ... شو تجربتك الشخصية عن هاد الموضوع (هي الفقرة كتير بحبوها اللجنة) 

أنا إجاني بالفحص مقطع عن الجامعات بأمريكا , عم يناقش المقطع إنه درااستك بجامعات عريقة وغالية ما بيضمنلك الوظيفة و بالتالي الطالبة قررت بالمقطع إنها تلتحق بجامعة أرخص وفيها تسلية أكتر طالما العمل مو مضمون بكل حال فليش لتفني حالها ومصرياتها بجامعات صعبة متل هارفرد و MIT 

فهون ممكن تعطوا رأيكم إنه صحيح هالكلام ولا بتعتبروا هيك احصائيات مانها دقيقة وإنها الدراسة بجامعات عريقة بتفتح قدامك أبواب أكتر 

الجزء الرابع: Problemlösung بيطرحوا مشكلة بنص السؤال , مثلا إنت وشريكك لازم تحضروا لتعملوا كورس بمجال معين .... صعوبته إنك بتكون عم تحكي عن هي المشكلة لأول مرة مع الشريك جوا الامتحان ... يعني إنت محضر شي معين , مثلا محدد سعر للكورس و يطلع شريكك حاطط سعر غير وهون بدكم تبلشوا تتناقشوا مع بعض و تتساوموا لتلاقوا سعر يناسبكم تنيناتكم , تتفقوا على موعد الكورس ومدته (أسبوع , شهر .. الخ ) و مكان الكورس 

أهم شي تطرح رأيك و تشرح لشريكك ليش متمسك فيه ... ما كل شي بقوله بتقله والله فكرة عظيمة , لازم تفرجي شخصيتك و تقنعه بإنه برأيك هاد الصح وليش ... 

طبعا بعد انتهاء الفحص مافيك تعرف نتيجتك من اللجنة .. بس بيكون واضح من النقاش ردة فعلهم و تفاعلهم معك ...

وهيك بنكون خلصنا أجزاء امتحان البي 2 , و رح حطهم بألبوم مع شوية صور لبعض القواعد الي لخصتها ع دفتري .... ان شاء الله كون قدرت فدتكم 

بالتوفيق للجميع يا رب :)

الصور :